佘詩曼在97年參選港姐。
踏住港姐的翹板走入星光大道，佘詩曼（阿佘）憑住美麗與演技並重，在電視圈吸金15年，身家幾何級數膨脹，化「佘竇」為金屋。華麗螢幕背後，她亦展現不可小覷的「財智」。多年來儲起至少八成的收入，在她精心打理下，每年穩漲六至七位數。
阿佘接受本報專訪時雖稱不諳投資，但她談起買樓之道卻散發自信，儼如一名久經歷練的老手。「買樓嚟儲錢最穩陣，好似過千萬嘅樓畀一半首期後，租金通常都可以覆蓋到供款，等於有人幫你供滿……香港地係得咁多，我覺得樓價（長遠）一定會升。只要唔係貪心要喺短期內實現，呢條數一定會賺，更加唔會一下子冇晒。」
500萬買海景台賺868萬
其實阿佘過去買賣紀錄僅兩、三次，但從未損手，最差一次都賺到22萬元。其中最為人驚嘆的是，她有膽色在2003年以沙士價500萬元，買入北角海景台高層單位，並在七年後高價沽出，低買高賣間狂賺868萬元，升值1.7倍。她隨即換大屋，進駐九龍塘半山豪宅。
當年人心惶惶，皆對樓價一跌再跌的深淵卻步，但她敢於入市，背後是否有高人指導出手撈底？她解釋，買樓一般只是聽經紀推介，再問朋友意見。「2003年買樓純粹係咁啱（舊單位）租約滿想搬，我又承擔得起就買囉。間屋有180度維港煙花景，廳、房連廁所都睇到，我覺得一定值錢嘅。」
其看法至今仍然成立，市場資料顯示，該海景台單位最近已升值至最多1700萬元，相較阿佘去年初的賣出價1368萬元，還有330萬元溢價。她說，「永遠都meet唔到最好嘅位，投資又唔需要太貪心。當其時已經好開心，我真係覺得個位高到要（適時）套現。」
雖然近期本港樓價居高不下，但阿佘仍有意入市，「暫時想買多兩間嚟收租，不過心理狀態真係好矛盾，唔知望佢跌定升。樓價跌，經濟會好差，影響各個行業，經濟唔差，樓價唔會跌。」她笑說，「有啲心灰意冷，惟有靠睇Feel同心水囉。」
隔山買牛 棄內地置業
阿佘去年開始主力北上賺人仔，然而她暫時無意在內地或者海外置業，「好多人都叫我喺內地買樓，但唔係自己睇住，我硬係唔放心。」她指現時沒有任何內地投資，甚至沒有做過比香港高息的內地人民幣定期存款。
不過，數到最自豪的投資，比起買樓，阿佘反而覺得是六、七年前開始儲落的一大筆人民幣，她承認，人民幣主要是來自工作收入，慢慢滙返香港做定期，至今升值逾兩成，佔其所有外幣存款的九成。但都有試過「一下子轉過最多七位數嘅人民幣。」
佘詩曼物業買賣戰績
北角海景台1227呎賺868萬元 買：2003年500萬元 賣：2010年1368萬元
鴨脷洲深灣軒655呎賺22萬元 買：2004年456萬元 賣：2007年478萬元
九龍塘帝景峰1600呎賬面賺230萬元 買：2011年1850萬元 賣：現市值約2080萬元
佘詩曼小檔案
年齡：37歲
學歷：瑞士國際酒店管理大學酒店管理系
1997年：參選港姐獲季軍，簽約TVB正式入行，其後被力捧參演多部重頭電視劇，一度為四大花旦之一
2000年：憑《十月初五的月光》與張智霖奪得TVB「本年度我最喜愛的拍檔」
2006年：憑《鳳凰四重奏》奪得TVB「最佳女主角」及「我最喜愛電視女角色」，成為首位雙料視后
2007年：憑《火舞黃沙》獲提名角逐第35屆國際艾美獎「最佳女主角」
2011年：與TVB約滿後改簽兩年部頭約，轉攻內地
至今：已拍攝49部電視劇及7部電影
*************************************************************************************************************************
[2012.9.9] 管理身家 分散投資資產年漲百萬《蘋果日報》
佘詩曼投資篤信銀行和圈外朋友的意見，將一半身家交由銀行投資顧問打理，每年坐收最多過百萬元。「平時好忙，我又好怕睇字，睇睇吓會瞌眼瞓。」阿佘自認沒有定時留意財經資訊，但投資前都會先徵詢兩至三間銀行的顧問意見，「至今未有大出錯」。其中一間銀行還設有信託（Trust）管理一筆資產，「嗰個係我信得過嘅朋友，畀佢任玩，但有錢賺。」
部份交信託管理
她追求穩中求勝，「我唔會將所有積蓄放晒喺一種投資……（除咗物業外）將錢分三份，分散喺儲蓄、基金，同埋穩陣股票；只有少少外滙同股票短炒。我可承受風險系數唔大，除咗樓按，未試過借錢投資。」
雖然阿佘對投資戶口的回報率沒有概念，但這副身家的「大數」常存心中，「一定高過銀行啲息，平均每年總回報至少有六至七位數」，這意味每年坐收十萬至過百萬元。
97年參選港姐，阿佘入行短短三年已憑飾演《十月初五的月光》祝君好一角奪獎成功冒起，其後穩坐無綫電視（TVB）四大花旦其中一席位，財源亦滾滾而來。她去年與娘家TVB改簽兩年部頭合約，轉攻內地市場，市傳她接拍一集電視劇的身價，已漲至15萬至20萬元人民幣。
不過阿佘指，沒有為自己的身家設定一個終極目標，「因為永遠都會覺得唔夠，儲到500萬嘅時候，又想要800萬，目標會一路增大。趁依家有能力就賺多啲，有時間就碌大佢，他朝一定有用。」
她坦言，「依家賺錢依然可以俾到我最大安全感，每次賺到一嚿錢，都會好開心……點都儲起八成喺銀行。」只因阿佘同樣在「那些年」捱過騾仔，開始工作時月入僅萬餘元，返工第一年還要向人借錢交稅。當時想自食其力，錢比任何嘢都重要。
*************************************************************************************************************************
[2012.9.9] 慘痛教訓 短炒股票蝕廿萬未釋懷《蘋果日報》
佘詩曼在投資路上曾踩過地雷，受道聽途說的引誘，賠上逾20萬元學費。這次血的教訓，令她至今未能釋懷。此事已過去逾十年，但阿佘提起時仍心有餘悸，「好心痛，聽人講走去買咗隻股票短炒，點知一個月輸咗廿幾萬，對我嗰陣收入嚟講真係好多錢。」她形容當時剛入行數年，還在租住清水灣孟公屋村屋，未有置業。「呢個慘痛教訓好大，就算（發生在）依家我都承受唔到，唔鍾意嗰種感覺……所以以後就算再有短炒，投資額都好細。」
不少藝人在娛樂圈賺到錢，都嘗試投資生意，阿佘亦不例外。2007年底，她與曾志偉、洪金寶、鍾鎮濤等合資，在四川成都經營一間明星澳門茶餐廳。可惜開業僅半年已失敗離場，當時有報道指是因股東之間為錢銀問題內訌。她在訪問中沒有透露太多，「嗰陣同B哥哥佢哋熟，唔會呃我，咪試下做，最後都冇蝕錢。」
阿佘自此在商場止步，「真係冇乜興趣」，她認為自己不善營商，亦無法兼顧。「做生意要搵好信任嘅朋友，但如果有唔熟嘅朋友（參與其中），都有風險。」至於曾傳聞在銅鑼灣開設美甲店等，她均予以否認。
投資切忌貪心
總結投資心得，她有以下忠告：「任何投資都唔好貪心，財不入急門，亦切忌人云亦云，最好徵詢專業人士，接受多方意見。」她亦不忘重申「買樓至上」的主張，「任何人都應該儲錢買樓，起碼解決到居住問題，又唔會蝕得去邊，特別係啱啱起步嘅人，賺到嘅錢好珍貴，一定要善用，唔好要自己承受太高風險。」
*************************************************************************************************************************
[2012.9.9] 日常理財 最愛用Cash找數 僅擁兩張信用卡《蘋果日報》
在《絕代商驕》飾演孭住一身卡數而淪為收數的「林淼淼」。
賺錢有道的佘詩曼，控制開支的妙法卻是「用Cash」。她自爆近兩、三年才開始使用信用卡，亦勸誡初出茅廬的年青人，要「睇住張卡」！「我入行嘅年代好興勁出信用卡，身邊好多朋友、同學一個二個都爭卡數」，為避免墮入相同陷阱，阿佘自己多年來一直都是用現金付款，「碌卡找數會冇數，唔知用咗幾多錢。」她近年申請信用卡，主要因為經常外出旅行，難以攜帶大量現金，而且更重要的是，現在已具備找數能力。
並無控制花費
阿佘說，「就算依家我都只有兩張信用卡，另一張仲係最近經朋友多次勸喻，話Citibank PremierMiles信用卡儲mileages好抵，我先申請多張，其實我都未慣畀卡。」訪問當日，記者亦親眼目睹她仍用現金埋單。
2009年播出的時裝劇《絕代商驕》最近重播，阿佘飾演「林淼淼」一角，就因瘋狂購物，欠下大筆卡數，被迫淪為收數妹。阿佘自覺現實中對金錢的態度遠不及該角色進取，「佢就最想無本生利。」
不過她坦言，自己並無特意控制平日的花費，「我都好似其他女仔咁，只要鍾意都會買埋啲唔等使嘅嘢；但唔算係大使嘅人。」
Charmaine Sheh 佘诗曼粉丝专页： http://www.facebook.com/520charmainesheh
No comments:
Post a Comment